ENPLEGUA ETA PRESTAKUNTZA

Beterri-Buruntza eskualdean enplegu aukerak sortzea eta pertsonen enplegagarritasuna hobetzea da gure xedea.
Enplegu eta prestakuntza programen bidez, pertsonen gizarteratzea eta lan munduratzea erraztu nahi dugu beraien bizitza kalitatea hobetu asmoz, beti ere, kalitatezko enplegua sortu nahian eta lan merkatuan atzeman diren enplegu beharren arabera. Horretarako zerbitzu egokor eta egitasmo ezberdinak ditugu abian:














ENPLEGUA
1 Enplegu soziala
Beterri-Buruntza Mankomunitatearen funtsezko erronketako bat enplegu sozialaren gaia jorratzea, eskualdeko ekosistema indartzea eta ibilbide eta programa soziolaboralen sistema eraginkor bat ezartzea da, laneratzean emaitza hobeak lortzeko. Azken urteotan lanketa sakona egin da helburu horiek lortzeko.
Horren harira, 2025-2026rako Elkar-EKIN programaren lankidetza-hitzarmen berria sinatu da Gipuzkoako Foru Aldundiaren eta Beterri-Buruntza Mankomunitatearen artean, enpleguaren sustapenaren eta gizarteratzearen esparruan lankidetza eta gobernantza kolaboratiboa bultzatzeko. Hitzarmen berriaren baitan “Beterri-Buruntza inklusio soziolaboralaren bidean” programa garatzen jarraituko da, eskualdeko gizarteratze- eta laneratze-ibilbideak sendotuz eta egokitzapen berriak txertatuz.
Elkar-EKIN Lanean lurraldean enplegagarritasunerako eta aktibazio inklusiborako estrategia bat da. Estrategia honen bidez, ekonomia suspertzeko eta lehiakortasuna hobetzeko, kalitatezko enplegua sustatzeko eta gizarte-politiken eraginkortasuna areagotzeko estrategia integratu bat garatu nahi da. Helburua da pertsonen eta, bereziki, honako kolektibo hauen gizarte-kohesioa hobetzea:
- Bazterketa-egoeran edo bazterketa-arriskuan dauden pertsonak.
- Langabezian dauden eta enplegagarritasun-maila ertain edo baxua duten pertsonak.
- Enplegua duten baina lan-prekarietateko egoeran dauden pertsonak.
Programa honek enplegu sozialeko baliabideen arteko koordinazioa indartu eta eskualdeko sare-lana sendotu nahi du, pertsona guztientzako lan-aukerak eta enplegu inklusiboa sustatzeko.
Enplegu sozialaren ekosistema Beterri-Buruntzan
Beterri-Buruntzako enplegu sozialeko ekosistema eta inklusio sarea, koordinaziorako, lankidetzarako eta lan-merkatuan txertatu edo enplegua mantentzeko zailtasunak dituzten pertsonen laneratzean inplikatutako eragileen elkarlanerako esparru egonkorra da.
Helburua da eragile horien esku-hartzeak eraginkorragoak izatea edo ingurunera egokitutako erantzun berriak garatzea.
Sarea, Beterri-Buruntzako Enplegu sozialeko ekosistema eskualdeko hainbat eragilek osatzen dute eta Gobernantza sistema propioa du.
Nork parte hartu dezake Sarean?
Sareko kide izan daitezke eskualdean egoitza iraunkorra edo jarraitua duten administrazio publikoak, enpresak, korporazio publikoak eta erakunde pribatuak, eta/edo eskualdean jarduten dutenak aktibazio inklusiboarekin, enplegu arrunta edo babestua sustatzearekin eta horretarako zailtasun handienak dituzten pertsonak bertan egotearekin zerikusia duen edozein arlotan.
- Helburua partekatzen duten erakundeak, jarduera-eremu bakoitzeko pertsonen gizarteratzean eta laneratzean bat eginez. Lurraldeko pertsonak gizarteratzeko eta laneratzeko helburu partekatua.
- Eskualdean egoitza iraunkorra/jarraitua duten agenteak, eta/edo
- Eskualdean eragin zuzena duten eta sarearentzat interesgarriak diren eskualdez gaindiko eragileak.
Zer suposatzen du sarearen parte izateak?
- Parte hartzen duten erakundeek sarean aktiboki parte hartzeko konpromisoa hartzen dute.
- Sarearen lidergoa duen erakundeak izango du erakunderen bati baja emateko eskubidea, baldin eta parte-hartze aktiboko baldintzak betetzen ez baditu, eta ezarritako lankidetza- eta jarduera-printzipioak betetzen ez baditu.
- Sarean parte hartzeak ez du inolako egoeratan kontraprestazio ekonomikorik izango.
Hurrengo bilera noiz izango da?
Sare osoaren hurrengo bilera 2025eko lehen hiruhilekoan izatea da aurreikuspena.
Zer egin dezaket sarean parte hartu nahi badut?
Sarearen parte izan nahi baduzu, jar zaitez gurekin harremanetan eta informazio guztia helaraziko dizugu.
2 Enplegu eta prestakuntzarako baliabide eta programak
Programak
a) ElkarEkin programa
ElkarEkin programa Gipuzkoako Foru Aldundiaren eta Beterri-Buruntza Mankomunitatearen arteko lankidetza-esparruan kokatzen da, enplegu sozialaren eta inklusio soziolaboralaren sustapena bultzatzeko. 2025-2026 hitzarmenaren baitan, programa honen helburu nagusia da eskualdean bazterketa-arriskuan edo enplegagarritasun-zailtasunak dituzten pertsonen laneratzea eta aktibazio inklusiboa sustatzea, hainbat sektoretan formakuntza espezifikoak eta enplegurako prestakuntza eskainiz.
Itinerario bakoitzaren bidez, parte-hartzaileei prestakuntza teknikoa, gaitasun sozialen garapena eta lan-merkatura sartzeko aukera emango zaie, sektore bakoitzaren beharretara egokitutako ekimen espezifikoekin. Programa honek lan-orientazioa, prestakuntza eta lan-esperientzia uztartzen dituen metodologia integratua erabiltzen du, parte-hartzaileen enplegagarritasuna hobetzeko.
Itinerarioak
-
1. Nekazaritza Eskola
- Lehen sektorean laneratzea sustatzeko prestakuntza-programa.
- Helburua: Lan-erreleboa bermatzea eta tokiko nekazaritza-industriaren indartzea.
- Edukia: Oinarrizko nekazaritza-teknikak, uzta bilketa, laborantza ekologikoa eta lehen sektoreko lan-baldintzak.
-
2. Soldadura
- Helburua: Pertsona helduentzako industria-sektorerako trebakuntza espezifikoa.
- Edukia: Oinarrizko eta aurreratuko soldadura teknikak, segurtasuna, materialak eta muntaketa industriala.
-
3. “Gela Zuria”: Osasun erabilerarako materialak.
- Helburua: Material sanitarioen muntaketarako eta garbiketarako gaitasun espezifikoak eskuratzea.
- Edukia: Material sanitarioaren maneiu egokia, higiene-protokoloak, eta lan-segurtasuna.
-
4. Ostalaritza: Jatetxeko eta tabernako eragiketak.
- Helburua: Ostalaritza-sektorean laneratzeko aukera eskaintzea.
- Edukia: Jatetxe eta tabernetako funtzionamendua, zerbitzari oinarrizko teknikak, bezeroarentzako arreta eta lan-prestakuntza.
-
5. Ostalaritza: Sukaldeko oinarrizko eragiketak.
- Helburua: Ostalaritza-sektorean laneratzeko aukera eskaintzea.
- Edukia: Jatetxe eta tabernetako funtzionamendua, sukaldaritza oinarrizko teknikak eta lan-prestakuntza.
-
6.Arotzeria eta Zurgintza
- Helburua: Belaunaldi-erreleboa ahalbidetzea eta eskulana hobetzea.
- Edukia: Egur-lanketa, tresneria mekanikoa eta artisau-berrikuntza teknikak.
b) Hazilan +
Zer da?
Hazilan+ kualifikazio maila ertain-altua duten langabeen laneratzea eta enplegagarritasuna hobetzeko programa bat da. Jarduera hau Europako Gizarte Funtsak diruz lagundutako programa bat da, eta Garapen Agentzien Euskal Elkarteak (Garapen) garatuko du, Euskal Autonomia Erkidegoko Tokiko Garapen Agentziekin lankidetzan.
Nori zuzentzen zaio?
Kualifikazio-maila ertain-altua izan arren lan-merkatuan sartzeko edo berriro sartzeko zailtasunak dituzten pertsonei:
- Lizentziatu berri diren eta esperientzia handirik ez duten gazteak.
- Lan-merkatura itzultzeko prozesuan dauden pertsonak.
- Langabezian geratu diren eta birkualifikazioa behar duten pertsonak.
- 40 urtetik gorako pertsonak.
Helburuak
- Gaitasun sozioprofesionalak eta zeharkakoak hobetzea eta ahalduntzea, lan-munduari beldurrik gabe heltzea erraztuko duten tresnen bidez eta beraien ahalmen guztiak garatuz, autoezagutzatik eta lanerako ezagutzaren eta trebetasunen errebalorizaziotik abiatuta.
- Lana bilatzeko ibilbide osoan zehar lan-aktibazioa sustatzea, laguntza eta aholkularitza prozesuen bidez, eta emakumeen ahalduntzea bereziki azpimarratuz.
- Lanbide-profilaren eta -helburuen arabera lan-esperientzia lortzen laguntzea.
- Lanbide-gaitasuna hobetzea eta lanpostuan esperientzia hartzea, enpresetan proiektuak eta praktikak garatuz, eta pertsonak enpresen balioetara hurbilduz.
Ibilbide posibleak
- OSATU (taldekako prozesuak): Berrikuntzarekin eta garapen pertsonalarekin lotutako gaitasun pertsonalen entrenamendu-programa eta enpresako praktikak. Honako ekintza hauek barne biltzen ditu: kaptazioa, enplegagarritasun-elkarrizketa, gaitasun pertsonalei buruzko prestakuntza eta orientazioa.
- LORPEN (banakako prozesuak): Berariazko esku-hartzea, parte-hartzaileen gizarteratze zuzena lantzera bideratua, banakako mentoring prozesu trinko baten bidez.
Egitasmoa 2024tik martxan dago. 2025ean Lorpen eta Osaturen edizio bana egingo dira.
d) Prestakuntza kualifikantea
Zer da?
Hainbat ikastaro presentzial antolatzen ditugu lan-munduan aitortutako ziurtagiri profesionalak eta zeharkako beste gaitasun batzuk lortzeko.
Nori zuzentzen zaio?
Langabezia egoeran dauden pertsonei.
Zer onura dakartza?
- Lanpostu bat lortzeko beharrezkoak diren gaitasunak eskuratzea.
- Sektoreari buruzko ezagutzak eguneratzea.
- Profesionaltasun-ziurtagiri bat edo segurtasunaren arloan beharrezkoa eta nahitaezkoa den lan-ziurtagiri bat eskuratzea.
- Enpresekin harremanetan jartzea, lanekoak ez diren prestakuntza-praktiken bidez.
e) Tokiko enplegu ekintzak (Kontratazioak + Kontrataziorako dirulaguntzak)
Zer da?
Tokiko Enplegu Proiektuak, tokian-tokiko esparruan enpleguaren tokiko sustapena eta garapena bilatzen duten programa zehatzak dira. Beterri-Buruntza eskualde mailan 2012an egindako Eskualdeko Enplegu Planaren baitan proposatu ziren neurrien artean kokatzen dira.
Tokiko Enplegu Proiektuak Lanbidek urtero ateratzen duen enplegua sustatzeko toki-ekintzetarako diru-laguntzen deialdiaren bidez finantziatzen da.
Enplegua sustatzeko toki-ekintzen barruan bi mota bereizten dira:
- Enplegua sustatzea: aldi baterako lan-esperientzia bermatzen duten kontratazioak langabetuen enplegagarritasuna sustatzeko asmoz.
- Kontrataziorako dirulaguntzak: langabeak tokiko enpresek merkatu arruntean kontratatzea errazteko laguntzak
f) Talentuaren kudeaketa
Talentuaren kudeaketaren helburu nagusietako bat da enpresak bilatzen duenarekin bat datozen trebetasunak, ezagutzak eta balioak dituzten gizabanakoak identifikatzea eta erakartzea.
Lanaren zentzua
Zer da?
Lanaren zentzua Gipuzkoako Foru Aldundiko Ekonomia Sustapeneko eta Proiektu Estrategikoetako Departamentuak bultzatutako proiektua da, Etorkizuna Eraikizeko ThinkTank ekimenaren barruan kokatzen dena, etorkizuneko lanari lotutako ekintzak eztabaidatu eta abian jartzeko.
Helburua
Proiektuaren helburua enpresa batetako langile diren pertsonen inplikazioa eta ongizatea areagotzea da, horren ondorioz, antolaketa-errendimendua hobetzea ahalbidetuko duen ibilbide-orri bat egitea sustatuz, lan-testuinguruen berrikuspenaren/hausnarketaren bidez (pertsonentzat “zentzuzko” testuinguruak izan daitezen bilatuz).
Lan-metodologia
Mondragon Unibertsitateak garatutako metodologia batean oinarritzen da. Garapen pertsonalaren ikuspegi positibo batetik lantzen du lana, pertsonen lau ‘oinarrizko beharrak’ asetzera bideratuta, lanari zentzua aurkitzeko eta ongizatea sentitzeko: autonomia, gaitasuna, harremana eta helburua edo asmoa. Izan ere, lanak zentzua duela sentitzeko bete behar diren oinarrizko lau gako edo premia nagusiak dira hauek.
- Autonomia. Egiten dugun lanaren jabe garela sentitu behar dugu, erabakiak hartzeko eta gure izaera eta sentitzen duguna partekatzeko libre garela.
- Eskumena. Lanak eskatzen dizkigun emaitzak lortzeko gaitasuna, hau da, lana menderatzen dugula eta lanean eraginkorrak sentitzen garela.
- Harremana. Inguruan ditugun ikaskideekiko lotura garatzen saiatzen da. Gakoa gainerakoekin harremanak garatzea eta taldeko kide izatea da.
- Helburua. Bakoitzaren lanean ere gainerako pertsonei edo gizarteari ekarpen positiboa egiten diogula sentitzea. Gure lanetik haratago munduan eragin positiboa bilatzea da kontua.
Enpresekin lan egiterako orduan, pertsonek enpresan duten ongizate maila ezagutzea da abiapuntua. Ondoren, zergatik dauden horrela eta enpresak nola eragiten duen horretan ulertzeko saiaketa egiten da, azkenik pertsonak gehiago atxikitzeko eta motibatzeko barne-dinamika berriak ahalbidetuko dituzten lan-sistemak diseinatuz.
3 Dirulaguntzen inguruko informazioa
Beterri-Buruntza Mankomunitateak eskualdeko garapen sozioekonomikoa sustatzea du xede. Egoera honetan, deialdi honen bidez, bi helburu nagusi lortu nahi dira:
- Eskualdeko enpresei laguntzea langileak kontratatzeko gastuei aurre egiten eta,
- Enplegu-politika aktiboak indartzea, eskualdeko langabeen kontratazioak errazteko.
Eskaerak aurkezteko epea deialdi honi esleitutako kreditua agortzen den unean amaituko da, edo, gehienez ere, 2025ko otsailaren 15ean. Deialdia lehiarik gabeko konkurrentzia prozeduraren eta banakako ebaluazioaren bidez egingo da eta gehienez, enpresako bi kontratu lagunduko dira diruz.
Laguntza izango duten kontratuak hurrengo betekizunak bete beharko dituzte:
- Edonola ere, kontratuak hasi beharko dira 2024ko urtarrilaren 1ª eta 2024ko abenduaren 31 bitartean.
- Kontratuak lanaldi osoko edo lanaldi murriztuko kontratu mugagabearen modalitatearen bidez formalizatu beharko dira. Nahitaezkoa izango da pertsona kontratatuta egotea, gutxienez, 12 hilabetez kontratazioaren hasieratik.
- Artisten eta jendaurreko ikuskizunetako teknikarien eta laguntzaileen kasuan bakarrik onartuko dira iraupen jakineko kontratuak. Kasu horretan, gutxienez 3 eta 6 hilabete arteko iraupena ezan ahal izango dute.
Enplegurako dirulaguntzaren zenbatekoa kontratatutako pertsonen soldataren eta Gizarte Segurantzako kostuen %75 artekoa izango da, lanaldi osoko lan kontratu mugagabe bakoitzeko 8.000 euro arteko mugarekin. Iraupen jakineko kontratuen kasuan, 3.000 euro 3 hilabeteko osoko kontratu bakoitzeko, eta 6.000 euro 6 hilabeteko edo gehiagoko lanaldi osoko kontratu bakoitzeko.
Ezaugarri bereziak dauzkaten pertsonen kasuetan, (DBE titular edo onuradunak, 35 urtetik beherako pertsonak, epe luzeko langabetuak, 55 urtetik gorako pertsonak eta emakumeak) enplegurako dirulaguntza kontrataturiko pertsonaren soldata eta Gizarte Segurantza kostuen %100 izateraino iritsi daiteke, betiere 10.000 eurotako mugarekin lanaldi osokoa den kontratu mugagabe bakoitzagatik, eta 7.500 euro, sei hilabetetako edo gehiagoko iraupen mugatuko kontratu bakoitzeko.
Informazio gehiago behar izanez gero idatzi iezaguzu enpleguekintzak@beterriburuntza.eus helbidera edo jarri harremanetan telefono bidez: 943 244 523 / 747 498 467