Beterri-Buruntza Mankomunitateak, GARAPEN elkartearekin batera, HAZILAN+ laguntza programa jarri du abian. Eskualdeko langabezia egoeran dauden pertsonei lan-merkatuan modu lehiakorragoan sartzeko, enplegagarritasuna hobetzen laguntzea du helburu. Proiektuak, halaber, Europako Gizarte Funtsaren finantziazioaren babesa jaso du.
2025ean bi ibilbide eskainiko dira. Batetik, LORPEN, lan-merkatuan zuzenean sartzeko banakako ibilbidea. Lanpostua berehala lortzeko gaitasun nahikoa erakusteko gai diren pertsonei zuzenduta dago. Bestetik, OSATU, talde-saioak dira lan-merkatuan eskatzen diren trebetasunak lortzeko eta ibilbidea enpresako praktikekin osatzen da. Taldeko ekimenean parte hartzeko deialdia ireki du mankomunitateak eta interesa duenak apirilaren 22ra arte eman dezake izena.
OSATU formakuntza programaren xedeen artean, gaitasun sozio-profesionalak eta zeharkakoak hobetzea eta ahalduntzea da. Gaur egun enpresetan lan egiteko beharrezko tresnak eskainiz. Era berean, lan-aktibazioa sustatzeko, ibilbidean zehar laguntza-prozesuak eskainiko dira. Lanbide-gaitasuna hobetzeko gakoetako bat esperientzia hartzea dela jakinda, enpresetan praktikak egiteko aukera ere eskainiko zaie onuradunei. Saioak maiatzaren 9tik ekainaren 16ra bitarte izango dira. Ondoren, parte-hartzaileek enpresetan praktikak egin beharko dituzte, 2 eta 9 hilabete arteko epean.
Langabezian Dauden Pertsona Kualifikatuei Zuzendua
HAZILAN+ laneratzeko proiektu bat da, langabezian dauden pertsona kualifikatuei zuzendua adina kontuan hartu gabe. Prestakuntza izan arren, kolektibo horrek zailtasun bereziak ditu lan-merkatuan sartzeko, bai esperientzia ezagatik, batez ere berriki amaitutako ikasketak dituzten pertsonen kasuan, edota bai gaur egun enpresek eskatzen dituzten zeharkako gaitasun eta trebetasunik ezagatik. Beraz, langabezian dauden, edota titulua lortu berri duten pertsonei (erdi-mailako eta goi-mailako LH, unibertsitate-gradua edo unibertsitate-ondokoa dutenei), aurretiko lan-esperientziarik edo lanbide-profilari lotutako esperientziarik ez dutenei zuzendua dago. Programak arreta berezia jartzen du, halaber, geldialdi baten ondoren lan-merkatura itzuli nahi duten emakumeengan, kasu gehienetan zainketa lanetan egon direlako.
Parte hartu ahal izateko, beraz, ondorengo baldintzak betetzea beharrezkoa da: Beterri-Buruntza eskualdeko herriren batean erroldatuta egotea, langabezia egoeran egotea eta erdi-mailako edo goi-mailako Lanbide Heziketako zikloa, unibertsitate-gradua edo unibertsitate-ondokoa amaituta izatea.
Interesa duen orok, informazio gehiago eska dezake enplegua@beterriburuntza.eus helbidera idatzita eta izen-emateak formulario honen bidez egin daitezke.
